السعادة

السعادة
فاكر اول مرة تمشى او تسوق ؟ كانت صعبة .. دلوقتى مش بتفكر فيها .. سهلة جدا .. زى اى حاجه بتعملها ف اولها صعب ..
سر السعادة هو الاستمتاع بصعوبة الاشياء .. وكلما زادت الصعوبة زاد الاستمتاع .. لان السهل مفيش اسهل منه .

الكذب سهل .. الكسل سهل .. الخيانة سهلة .. النقد سهل .. انك تنتقد الشعب ورئيس الجمهورية ومدرب المنتخب الوطنى حتى سهل .. الشكوى طول اليوم زى سواقين التاكسى سهلة .. انك تقعد فى بيتك قدام التلفزيون سهل .. انك متحبش حد سهل .. انك تسيب حد سهل .. انك تانتخ سهل .. انك تفشل سهل .. انك تدمن سهل .. انك تخاف سهل .. انك تقول حاضر لاوامر انت مش مقتنع بيها سهل .. انك متصليش سهل .. انك تعيش حياتك من غير ماتغير نفسك واللى حواليك للاحسن سهل ..انك تشتم من غير ماللى قدامك يسمعك سهل .. انك تفتكر ان مصر اسوأ مكان واحلامك وردية ف بلاد بره سهل ..
بس انك تقول الحق ويبقى عندك عزيمة .. وانك تفكر ازاى تغير اللى مش عاجبك .. وانك تطلع اعذار لمن اخطا .. وانك تحب الناس .. وانك تتمسك بيهم .. وانك تعمل خطط وتنفذها .. وماتستلمش .. وانك تحارب نزواتك وغريزتك وماتسمعش للى انت مش مقتنع بيه ..وانك يبقى عندك امان داخلى واستقرار روحانى مع اللى خلقك .. انك تحب مصر وتبقى حالف كل يوم انك كبنى ادم تبقى احسن وتشيل شوية من التراب اللى هى مدفونة تحتة .. انك لما يبقى عندك 60 سنة متباقش ندمان على عمرك اللى فات من غير ماتعيشه زى مكان نفسك تعيشه .. انك تتنفس الهوا وانت حابه ومقتنع بيه بتشكره انه دخل مناخيرك .. ده اللى صعب

صعب اوى كمان ..
صعب هتستمتع قوى لو عرفت تستمتع بيه ..
هتستمتع اوى لما تكسب نفسك وتكسبة ..